【Now財經台】內地出口表現未見復甦跡象，中國外運(00598)管理層預期，受貨運需求疲弱、運力供應增加影響，今年海運及空運運費將會雙雙受壓。
與此同時，摩根士丹利最新下調集裝箱航運業今、明兩年盈利預測，並將海豐國際(01308)評級降至「與大市同步」。
資深證券分析師彭偉新指，雖然現時運費急跌，但其實只係重返2016至2018年嘅中位數，而非跌至經濟蕭條時期水平，至於大摩下調海豐評級，唔代表公司表現將會好差。
佢解釋，航運股因為之前運費貴得離譜，刺激股價水漲船高，亦令好多投資者憧憬緊板塊會反彈至疫情初期高位，Castor相信，大摩係想提醒投資者要調整返對行業前景嘅睇法，雖然航運股後市未必會爆升，但仍會跟隨大市向上。
此外，大摩最睇好運油行業，認為中國經濟重啟將帶動石油需求，加上新船供應有限，最新上調中遠海能(01138)評級至「增持」，大幅上調目標價60%至7.58元。
Castor補充，歐洲亦因俄烏戰事更需要靠海上運油，佢預期今年能源海運需求繼續強勁，將帶動中遠海能股價短期內重上8元以上水平，甚至有機會破高位。
