【now.com財經】今朝揀咗隻恒指牛(69164)出嚟，以今朝Patreon出文時間10點13分，on top比多10分鐘作為刨文時間，即10點23分，睇返當時五分鐘圖，會見到 當指恒指剛好停喺保歷加通道中軸兼且出現支持，符合咗(69164)進取mode出場嘅策略。好耐都未試過啲時間夾得咁準，呢頭睇完嗰頭 剛好見到入貨位，以10點25分起計10分鐘作為入場時間，(69164)期內高低位做過0.07元/0.061元，平均買入價為0.0655元。
落場之後，指數嘅走勢當然不似預期啦，可能仲有一個星期就到農曆新年長假期，指數喺保歷加通道上上落落，悶到人都發瘋，至依家下半場開市後見指數確變踩住保歷加中軸有力再向上彈高，但都真係得一下，又再次向住中軸再去；比較好嘅係，至少指數仍然處於保歷加「上升通道」先啦。小心嘅係今日星期五，咪掛住諗下一陣去邊度Happy Friday到唔記得咗自己係有貨喺手。
所以，如果仲有好倉在手嘅，Lock住五分鐘圖嘅保歷加通道中軸做量度線，失守的話比多一步自己，就係如果保歷加通道口無拓闊的話，好倉守到底線博比觸底可以(當然要睇下你嘅注碼有幾大啦)；但如果見到保歷加通道口有拓闊的話，咁就立斬啦。
又如果成個下半場指數原來係以慢活姿態呈上，掂下中軸又無穿，彈出彈入到至收市前都係咁嘅話，咁都相信(69164)都應該可以爬到格仔，唔過Weekend為大前題的話，臨完場前10分鐘收工。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
