【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、中國移動(00941)、中國海洋石油(00883)、碧桂園(02007)及建業地產(00832)。
今日3隻中資電訊股股價勢如破竹，中移動衝緊上近3年高位，中國電信(00728)見3年半高位，中國聯通(00762)亦升上逾兩年高位。3隻股份本身冇乜消息，今日嘅升勢似乎係大市喺高位整固下，有資金追入一眾高息中資股所致。
大華繼顯執行董事梁偉源分析指，中資電訊股舊年派息和味，股息率高達6厘至9厘，喺波動市況中防守性高，而今年全球經濟或進入衰退嘅情況下，佢預期呢幾家公司仍會繼續派高息，因此，吸引資金流入呢個板塊避險。
Steven認為，投資者觀望緊內地復常進度，如果未來1至2個月經濟數據好轉，可能會從中資電訊股調離部分資金去投資其他概念股，但相信唔會令股價大跌，又提到摩根大通早幾日亦發表報告指，睇好呢個板塊今年繼續升。
