【Now財經台】賽生藥業(06600)提出現金要約，按每股10.06元、較上星期五收市溢價約14%，回購最多公司7700萬股股份，佔已發行股本約11.16%。股價今日造好，升逾7%。呢間從事腫瘤及重症感染研發嘅生物製藥公司，點解要做現金回購？公司股價喺上年12月初急升，因為旗下產品日達仙獲納入國家衞健委嘅新冠肺炎治療指南，投資者可以對未來業務有幾大憧憬呢？
《香港股票財技密碼》作者梁杰文指，賽生藥業持有多達26億元人民幣現金，而且舊年上半年業績唔錯、賺6億幾，錢多得滯就索性做回購。不過，股東未必被今次回購方案吸引，因為出價始終較約兩年前嘅18.8元上市價低好多，有大股東已表明唔會接受回購，佢估計接受回購嘅，只會係公司上市前嘅前期投資者或原始股東。
Mike又話，公司兩年前可以上市，係因為日達仙被評為可以醫新冠肺炎，令公司收入及純利急增，所以最近股價急升都只係舊調重彈。隨住對新冠病毒嘅群體免疫力建立，日達仙需求會減少，加上專利就快到期，將會打擊呢項主打產品嘅收益增長。
