【Now財經台】內房股又有好消息，內地為谷內房銷售，擬就佣金實施上限指引，消息一出，即炒起做內房代理嘅貝殼(02423)，今朝高開逾6%後，升幅一度擴大至近11%，之後升幅「腰斬」，午後維持約5%升幅，如果就佣金設限，其實應不利代理收入，點解貝殼股價今日不跌反升？
紅蟻資本投資總監李澤銘指，市場覺得政府連呢啲招數都出埋，明顯係想重點谷內房銷售，若內房銷售轉旺，對做房地產代理嘅貝殼必定有利，即使佣金少咗，喺銷售暢旺下仍可以量取勝。另一方面，有分析認為，貝殼始終較具規模，限制佣金上限嘅政策，傾向針對中小型地產代理，影響相對較大，反而對貝殼呢類公司嘅市場整合有幫助，為貝殼提升市場份額提供機會。Alan又話，更最重係，不論港股還是美股，貝殼都係市場上唯一可以炒嘅房地產代理股。
