【now.com財經】今朝揀咗隻恒指牛(67687)，無Set到買入價，不過見到指數喺開市後20分鐘，於高位出現爭兩點「平頂」後向下落，穿過50分鐘線(五分鐘圖10線)，再過100分鐘線(五分鐘圖20線)，再去臨完上半場前差不多到250分鐘(五分鐘圖50線)，Slow STC(14,3)去到上半場前五分鐘才見觸底回升。
當然，Slow STC(14,3)觸底回升是好倉的入市訊號之一，即日鮮的話可以此作為Swing Trade好倉出動的時間；不過，指數由今朝最多升逾600點，大幅縮窄至上半場僅升210點。誠如今朝喺文裡面講過，下半場畫Fibonacci畫恒指日線圖，睇下由14,597點開始至今嘅大型反彈浪發生緊咩事。就不如先睇睇指數發生咩事先再決定點樣落場。
先用歷史高位，即2018年年初嘅高位33484起計至上年10月低位14,597點拉一個Fibonacci出嚟，事實上恒指近來亦係由33,484點起跳到10月底為止，至近兩個月先至有比較明顯嘅反彈，圖上見其實只係爭1,000點左右就會踩到由0.382入0.5嘅範圍。
一切都好似好美好，仲假設埋如果33,484點呢個歷史高位係等於道氏理論嘅(5)浪頂的話，下跌浪(a)(b)(c)都已經畫得到出嚟，有似準返番去上升浪(1)咁嘅款。
「咁嘅情況唔係應該出好倉、甚至部定一個股作中長線持有咩？」可以咁講嘅，但如我今朝所指，你估捉轉角真係咁易咩；更何況呢三日兩個裂口咁上，我有啲擔心下面嗰兩個裂口。
依家1點24分，指數仍然處於21,000點附近徘徊，我被個Fibonacci搞到我有啲頭暈，都係抖抖算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
