【Now財經台】經營HKTVmall嘅香港科技探索(01137)去年12月日均定單總商品交易額(GMV)，以及每月定單GMV都係按年升約17%，而去年GMV就略高於目標，表現係咪對辦？
信達國際研究部主管趙晞文指，表現係對辦，雖然集團GMV目標較保守，但都要還公司一個公道，因為剛爆發第5波疫情時，有兩個月嘅GMV係非常例外地高，之後就回復至較穩定水平。
至於今年定單GMV增長目標介乎逾6%至約11%係咪太保守，佢唔認為係保守，始終集團唔係復常通關概念，主要以本地消費者為主，公司主要賣客量及定單規模，佢又認為應聚焦公司電商利潤率。
香港科技探索股價喺去年初疫情最嚴重時，曾迫近17元，依家就唔夠6元，市盈率(PE)約27倍，集團要搞業新業務就預咗要燒錢，擔唔擔心影響股價，趙晞文認為唔需要太擔心，始終公司經營咗咁多年，累積咗一定客戶規模，但股價及估值係咪可以更上層樓，就要睇4大業務嘅發展，但股價今年有機會挑戰6.5元至7元。
