【財經TOP SEARCH】騰訊分派美團或引資金追落後

【Now財經台】截至早上11時止，1小時內《彭博》用戶關注度上升最多嘅港股，依次為美團(03690)、騰訊控股(00700)、海底撈(06862)、碧桂園(02007)及中國恒大(03333)。

下周四(1月5日)係騰訊實物分派美團股份嘅除淨日，每10股騰訊可收1股美團，美團本周暫累跌逾3%，反而騰訊升5%，今日曾升至5個月高位，貼近250天線。

騰訊日前有國產及進口遊戲版號獲批，而且係重點遊戲獲批，前景可望逐步回暖？獨立股評人譚智樂認為，短線會有資金追落後，除咗估值較平，內地當局對進口遊戲重新「開綠燈」，亦會令投資者憧憬集團未來同外國IP有更多合作，有助拓展海外市場。

參考今年初騰訊就分派過京東，由1月除淨至3月派股及現金期間京東股價受壓，而且南非大股東Nasper喺收到股份後3個月內就沽清，美團明年首季走勢係咪難睇好？

Arnold認同美團短線會受壓，但指公司新業務增長速度比騰訊更快，中長線前景更樂觀，認為有貨可以繼續揸住。