【Now財經台】截至早上11時，1小時內《彭博》用戶關注度上升最多嘅港股依次為騰訊控股(00700)、領展房產基金(00823)、龍湖集團(00960)、美團(03690)及康希諾生物(06185)。
今日新上榜嘅領展首次進軍新加坡，斥資124億港元購入當地商場，係集團有史以嚟最大單一收購。呢單收購係咪有助集團分散投資？新加坡已經從疫情復常一段時間，本港又預計好快同內地通關，係咪都睇好領展前景呢？
椽盛資本投資總監曾永堅認為，從資產配置及分散投資風險嚟講，呢單收購無疑受投資者歡迎。新加坡雖然係風險低、穩定性高嘅市場，呢次收購嘅商場地段都唔錯，但當地商場物業收益率接近五厘，比較缺乏增值及增長空間，只可以講有助領展未來收益及估值平穩發展。
