【Now財經台】今日上市嘅醫療器械公司業聚醫療(06929)專注於經皮冠狀動脈介入治療(PCI)，以及經皮腔內血管成形術手術介入(PTA)等治療血管疾病嘅產品。
業聚醫療執行董事兼營運總監劉桂禎表示，公司成立21年，具備成熟嘅研發能力，擁有約188項已註冊專利及逾40項研發或註冊專利中嘅產品，配合營運策略同穩健嘅銷售網絡，將產品銷往全球逾70個國家，並指過去幾年嘅銷售量逐年提升。佢又提到，心血管疾病係全球頭號健康殺手，認為公司產品正好迎合到治療需求。
公司近兩2年收入分別為8800萬及逾1億美元，但舊年蝕逾440萬美元，被問及由盈轉虧係咪同內地疫情有關，劉桂禎表示，公司自疫情爆發以來，毛利率維持約70%，認為疫情對公司業績影響唔大，並強調好有信心趁內地推動使用國產醫療器械，可進一步拓展國內市場。
展望未來2年，劉桂禎預期，公司明年會陸續將一系列腦神經介入產品上市，亦正準備後年喺內地推出一系列治療結構性心臟病嘅產品。
