【Now財經台】截至早上11時止 ，1小時內《彭博》用戶關注度上升最多港股，安踏體育(02020)、旭輝控股集團(00884)、港交所(00388)、融創中國(01918)、李寧(02331)。
兩隻體育用品股，安踏及李寧都受惠於外圍Nike上季業績好過預期，Nike喺內地，撇除匯兌因素，已經回復增長，上季按年錄得6%升幅，Nike喺「雙十一」購物節更錄得破紀錄銷售額，大中華區庫存亦回復至較平衡水平。Nike內地銷售有改善，安踏及李寧係咪值得借鏡？
椽盛資本投資總監曾永堅指，Nike業績帶動一眾體育股，唔止喺香港上市嘅兩隻體育用品股，美國當地個別體育用品股都受惠，Nike喺去庫存方面最畀到市場驚喜，去庫存比預期理想亦帶動埋營利及營收，「雙十一」時內地仍受疫情影響，加上當時防疫措施較緊張，但Nike、安踏及李寧銷售都唔錯，預期體育用品未來銷售前景樂觀，但留意市場過往曾因「新彊棉」事件而抵制美資體育用品，依家對Nike嘅影響似乎已經淡化，對安踏及李寧可能會帶嚟更大競爭。
