【Now財經台】中創新航(03931)股價今日逆市造好，集團係寧德時代、比亞迪股份(01211)外，全國第3大電池生產商。花旗估計，中創新航喺內地及海外車用電池市佔率會持續擴大，又預期集團今年賺4億人仔，而未來兩年更增至介乎25億至52億人仔，又首次給予「買入」評級，目標價43.3元，但點解市場好似一直忽略呢隻股份？
紅蟻資本投資經理李澤銘指，中創新航上市時市況唔好，炒作電動車電池已經有啲過時，而成個行業最賺錢係最上游嘅鋰礦、鋰資源等，中創新航夾喺中間，無論造鋰電池還是造車，都受上游原材料壓力影響，下游無法加價，利潤空間好狹窄，利潤波動性大，即使今年有機會轉賺4億人仔，明年賺幾多仍然係不明朗。
Alan又話，中創新航下游產業係賣平價車，可以加價嘅空間有限，因此，市場一直認為中創新航不論交易結構，還是市場定位，都冇另外兩家電池企業咁吸引。
