【Now財經台】內房「抽水潮」持續，繼碧桂園(02007)、旭輝控股集團(00884)、雅居樂集團(03383)，新城發展(01030)之後，最新輪到合景泰富集團(01813)，公司擬折讓近15%，配股籌逾4.7億元，配股價2.01元，折讓幅度同之前配股嘅內房差唔多，集資都係用嚟還債、再融資等，合景泰富一直致力解決債務危機，今次配股係咪預期之內？
《香港股票財技密碼》作者梁杰文指，多隻大型內房帶頭「抽水」，依家2、3線內房「跟大隊」配股，其實市場都預咗內房可能趁市況好轉，不論集資規模大小，都會盡快集資。
Mike又話，雖然合景泰富集資唔夠5億元，相對公司現有債務係杯水車薪，或者只係夠畀今年到期嘅利息，但能夠成功配股，至少可以稍微改善財務狀況，畢竟喺依家嘅環境下，好難以低息做債務再融資，唯一出路都係配股。
