【Now財經台】美國聯儲局上周宣布加息0.5厘後，港銀隨即宣布上調最優惠利率(P)，滙豐銀行、恒生銀行(00011)、中銀香港(02388)都將P由5.375厘上調至5.625厘，至於渣打銀行，東亞銀行(00023)等，就將大P由5.625厘加至5.875厘。港銀暫時加咗3次息，幅度合共0.625厘，美國就加咗7次，合共加4.25厘，港銀明顯跟唔足，美國息口及本港銀行最優惠利率未來會點走？
經絡按揭轉介首席副總裁曹德明表示，美國今個加息周期同2014年好近似，香港加息步伐係明顯較慢，可能當年銀行按揭規模較依家細，所以加息步伐相對再慢，而當年本港經濟活動由差轉好，但今次就相反，由於疫情關係，經濟活動冇咁活躍，銀行態度相對保守，呢個亦係加息步伐較慢嘅原因。
