【Now財經台】內地放寬防疫措施，刺激航空股「升空」，不過，中銀航空租賃(02588)升勢相對失色，其實航空股蝕錢已蝕足幾年，反而中銀航空租賃唔使點蝕錢，只係今年上半年「見紅」，呢隻股份有冇盈利或估值復修槪念？
大華繼顯策略師楊韻銳表示，中銀航空租賃營運周期長，因此，公司受行業周期影響冇咁大。佢又話，中銀航空租賃相對於航空股，受惠於防疫鬆綁嘅程度冇咁大，因為買飛機嘅定單周期好長，今年交貨嘅飛機其實早於幾年前已訂購，因此，中銀航空租賃比航空股需要更長時間捕捉市道復甦機會。
Curtis估計，中銀航空租賃短期股價表現未必及航空股好，但公司勝在營運方面比較穩健，中長線仍可受惠防疫鬆綁。
