【now.com財經】今朝揀咗隻恒指牛(65793)出嚟,話喺11點後如果見到指數可以企穩於10小時線(小時圖10線)以上的話,就小注落場。睇返小時圖嘅10小時線為19,614點,拎住呢口價用返五分鐘圖去量度的話,其實10點半打後指數已經上咗10小時線之上,去到11點已經由19,700點向下回返落去入19,600至19,699點尾段範圍裡面,Slow STC(14,3)亦見由超買位出現觸頂回落,只係剛好企住喺五分鐘圖上嘅50分鐘線(五分鐘圖10線)之上。
比多五分鐘指數去行的話,去到11點5分,指數連50分鐘線都失守,當下粒燭低位見過19,599點,低於10小時線,(65793)未能成功出動。
隨後見住指數一直下行,最後仲落返去保歷加通道底線,都真係有啲奇,明明嗰時李家超講緊聽日開始可以唔駛用安全出行,但點解個市向下嘅呢?唔通朝早升嗰一段係春江鴨出現?還是只係唔駛用安全出行,但都仲要用針紙入餐廳所以無乜用?抑或憧憬變現實嘅時侯就係指數下跌之時?
雖然指數下行,但喺1點30分時於五分鐘圖上見指數係有一底高於一底嘅走勢,而由暫時高位19,707點往下見亦有出現一高低於一高嘅情況,兩件事夾埋就變咗個「三角形」出嚟,怪不得下半場開市至依家成半個鐘,指數都只係咬住升80幾至90幾點呢個範圍上落。
換一換個保歷加通道即見到通道口收窄。上半場出唔到倉,下半場擔心佢橫行,睇嚟今日都係得個睇字啦。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。