【Now財經台】先瑞達醫療(06669)獲喺紐交所上市嘅波士頓科學(BSC)提自願現金要約，刺激股價今日逆市向上，BSC以每股20港元，向合資格股東收購最多約2億股，佔已發行股本65%，現時持股51.65%嘅最大股東CPECHINA Fund，將會悉售持股，每股現金作價較上周五收市價，有逾31%溢價。
《香港股票財技密碼》作者梁杰文指，其實好難去判斷呢單交易好定壞，但今次收購方係一家美國上市公司，屬於全球醫療器械龍頭之一，單計美國市值已達5000億港元，佢係睇中先瑞達喺內地市場嘅前景而提出收購。事實上，先瑞達上半年已開始扭虧為盈，通告亦提及，外國龍頭藉收購先瑞達，可產生協同效應，而波士頓醫療器械相關技術亦同先瑞達有合作空間，前景可以睇高一線，始終泊到個大碼頭。
