【Now財經台】唔少板塊炒復常概念已1個月，包括營養類板塊，其中H&H國際控股(01112)股價暫時已連升7日，滙豐證券亦報告唱好H&H，上調明年銷售預測及目標價，最新睇15.5元，H&H股價今日已升至1年高位，過去兩個月累升逾倍，後市再升空間仲有幾多？
紅蟻資本投資經理李澤銘坦言，放寬防疫及逐步復常，對H&H呢類行業可以受惠存疑，因為嬰幼兒奶粉、益生菌、保健產品其實都偏向剛需，喺疫情下需求及開支都唔會明顯減少，H&H過去1至2年銷售下滑，未必同疫情有關，因為行業整體保持平穩，估計銷售下跌部分可能同出生率下滑有關，而要扭轉呢個情況係唔容易。
Alan又話，H&H股價相對落後，加上大市氣氛好轉，近期呢輪升勢，估計只係借勢跟炒。
