【Now財經台】截至早上11時止，1小時內《彭博》用戶關注度上升最多港股，依次為中國燃氣(00384)、融創中國(01918)、雅居樂集團(03383)、合景泰富(01813)及雅生活服務(03319)。
排榜首嘅中燃喺成交配合下大升，但其實行業本身冇乜消息，前排公司出咗業績，因為新接駁用戶減少，中期少賺20%，今日係咪炒復常，憧憬業務回升？
大華繼顯執行董事梁偉源指，今日燃氣板塊其他股份都有得升，燃氣股同疫情息息相關，封城時用氣量自然減少，導致中燃上半年核心盈利跌逾20%，但依家內地放寬防疫措施，工商用戶用氣量回升，會對燃氣公司業務有正面影響。佢又話，中燃股價今年10月跌穿7元，依家股價係跟住疫情因素走，亦反映投資者認為中燃係潛力股。
