【Now財經台】據國家郵政局數據顯示，上周五至周日期間，全國快遞日均業務量逾3億件，反映當局喺「保通保暢」嘅原則下，速遞業務快速反彈。華泰證券亦認為，速遞行業兼具供給彈性及需求韌性，疫後供給恢復速度比大部分行業快，睇好速遞遞送數量增速向上修復，加上內地即將迎來「雙十二」購物節，據內媒分析，估計今輪速遞需求，將較「雙十一」進一步改善，內地優化防疫措施後，物流速遞行業嘅派送量會唔會強勁復甦？相關股份現價反映咗呢啲利好因素未？
耀才證券研究部總監植耀輝指，速遞行業講求規模效益，過去一段時間因為封控措施，唔止增加行業成本，仲會延誤派送，對物流業來講，時間就係金錢，所以優化封控措施後，成本及時間嘅問題都得以紓緩，加上「雙十二」效益可能比「雙十一」更大，因此，物流股喺呢段時間都可以造好。
