【now.com財經】今朝揀咗隻恒指牛(64588)出嚟，以Patreon出文時間10點4分，On top加多10分鐘作為睇文時間，即10點14分，睇返當時小時圖，「身懷六甲」已經變咗樣，因為今朝早首半小時嗰支燭嘅高位已經高過噚日最後嗰一個鐘嘅陰燭高位。咁樣一下子衝咗上去等都唔等，(64588)唯有都一齊搶閘出動，以10點15分至10點25分呢10分鐘作為落場時間，按(64588)期內高低位做過0.074元/0.063元計，平均搶閘價為0.0685元。
落場之後其實指數都唔係一支箭再向上飆，五分鐘圖上剛好見到指數回返落去50分鐘線(五分鐘圖10線)，喺10點25分至30分更低走於50分鐘線，正當諗緊要Set定一個位止蝕嘅時候，忽然傳出港府研究放寬防疫措施，取消口罩令等等，消息出爐後向恒指打咗支強心針咁，指數慢慢地向上愈抽愈高，但整體見到由大約11點開始，見到指數同Slow STC(14,3)出現背馳嘅情況，用返以指數失守保歷加通道中軸作為不利好倉而走(64588)的話，咁應該午後返嚟嘅1點10分至1點20分走人。
按呢段時間(64588)高低位做過0.091元/0.083元，平均沽貨價為0.087元，呢一轉平均賺幅有27.01%。雖然有傳港府話取消口罩令，但說實話呢兩年幾一出街就要帶口罩，除咗上個月中過一次肺炎之外，其他啲傷風感冒(Touch wood)都真係無出現過，所以你有你取消，我有我帶多一陣，但係呢趟兩成七嘅平均賺幅，點都要同你講聲多謝嘅。
依家1點33分，恒指喺五分鐘圖上已經確認低走於保歷加通道中軸，唯同時保歷加通道口已經完成收窄，依家頂至底高度為142點，Sloe STC(14,3)觸底都無計，保歷加通道窄到咁，反正朝早完成一注，下半場都係齋睇為妙。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
