【Now財經台】奈雪的茶(02150)股價連日炒上，原本以為係炒內地放寬防疫措施，但原來仲有一單deal，就係公司斥資逾5億人仔，入股樂樂茶逾40%股權，依家樂樂茶有約140家門店，近半喺上海，公司喺內地逐步放寬防疫措施之際做收購，係咪諗住捕捉復常機遇？
華盛証券經紀部董事李偉傑指，今次呢單收購係「大食細」，都係一件好事，樂樂茶門市規模唔大，而且仲係蝕緊錢，協同效應方面，佢認為唔算太明顯，依家市場炒緊復常概念，公司喺疫情開始退卻時擴充，但呢單交易又唔算好抵好吸引。
奈雪的茶股價近幾日喺大成交配合下，暫時連升7日，累升逾60%，但相對IPO價，仍然要「深潛」，Jason指，奈雪的茶股價今日早段反應好正面，但隨著大市調整，加上已經超買咗唔少，由4元左右炒上依家8元水平，佢認為要等股價回套後，先再炒復常因素，而睇返技術指標，估計短期仍有調整空間。
