【Now財經台】希瑪眼科(03309)上周五晚宣布，擬透過配股引入策略投資者，集資逾1億元，希瑪股價午後一度抽升逾22%。集團計劃向內地富豪龔虹嘉配股，交易完成後，龔虹嘉將持有約2.37%股權，龔虹嘉本身大有來頭，係海康威視聯合創辦人，亦係細胞基因工程公司中源協和嘅董事長，希瑪引入呢位「猛人」，睇返今日嘅股價反應，係咪反映市場睇好公司前景？
《香港股票財技密碼》作者梁杰文指，醫療板塊近月大幅反彈，希瑪今次配股畀龔虹嘉，股份設有1年禁售期，隨即成為市場焦點，加上大股東最近不斷增持，刺激股價今日大升。
Mike認為，龔虹嘉係重量級人馬，相信可以幫希瑪引入其他內地投資者，不過，今次入股對龔虹嘉嚟講只係「零頭」，加上佢嘅持股量唔多，而禁售期後喺市場減持亦唔需要披露，中短線喺講，引入新投資者的確對公司有利，但長線嚟講，就要再睇希瑪同龔虹嘉旗下公司有冇業務上嘅實質合作。
