【now.com財經】今朝揀定隻恒指牛(64070)出嚟，Set好用五分鐘圖上見指數於保歷加中軸位有支持先至出手；安全嘅用返Slow STC(14,3)做Swing Trade嘅方法去做。
睇返成個上半場，恒指喺上半場完場前15分鐘失過中軸水平，但有計傾嘅，因為當時保歷加通道勁窄，所以喺唔多位嘅前題下失守中軸。又咁講，失守就係失守，(64070)出唔到就係出唔到。
至於安全Mode嘅話，怕且都係要比多少少時間，因為今朝指數大幅高開頂住高位橫行再上時，同步保歷加通道口都有拓闊，所以比咗Slow STC(14,3)出嚟行超買再超買，喺去到11點半打後保歷加通道明顯收窄時，Slow STC(14,3)無再出超買再超買嘅條件。半場見Slow STC(14,3)回落到中軸位置，但仍然都係未符合(64070)出場資格。
到下半場開市之後，指數喺初段時間都係未見到有好大變動，但放到個圖勁大就會見到指數於上半場尾段失守中軸後，50分鐘線(五分鐘圖10線)同中軸有重疊情況，原本計劃雙線支持如今變成雙線阻力，問題係爭在依家保歷加通道口仍然收窄中。一旦喺保歷加「下降通道」，指數隨保歷加通道口拓闊而向下亦不出奇，反正Slow STC(14,3)依家Swing到落接近超賣水平。
坦白講我仍然對上破150天線有少少保留，我清楚熊證街貨會變得愈來愈重，因為大家都係望住同一條線，更明白當街貨愈儲得多，對大市嚟講係愈強嘅誘因唔理技術走勢而行過去殺貨。但清楚明白咁又點？
依家1點13分，恒指升幅收窄至不足600點，五分鐘圖上見Slow STC(14,3)嘅%K線已經進入超賣範圍，保歷加通道口有少少拓闊，又因為咁所以Slow STC(14,3)先至有得落到超賣，都係唔好諗得咁複雜，揀隻高槓桿牛都係Day Trade行一趟Swing啫，Slow STC(14,3)觸底成功又可以重上保歷加上升通道中軸的話，(64070)就按策略出動啦。
落場，有時侯都係靠一鼓衝勁；止蝕先至需要冷靜。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
