【now.com財經】今朝呢度都係繼續做觀眾無出倉，而作戰室都唔係好得去邊，事關今朝等咗成個半鐘先至出到第一注淡倉，仲要尾市前見指數喺五分鐘圖上破返條50分鐘線(五分鐘圖10線)之後就四散。還好戰友們都有耐性一齊等，而大家都識得見好即收。
嚟到下半場，恒指有少少開始作勢轉向，觸發轉方向嘅位應該係今朝11點35分同11點40分喺底位出現嘅「穿頭破腳」開始。雖然到依家1點16分，見指數行得好似BB仔咁一仆一碌，不過，都真係可以畫得到「上升軌」出嚟，如果再搭多條50分鐘線的話，呢條「上升軌」會比較硬淨。最理想就更係連同保歷加通道口都打返開啦。買菜搭蔥再搭埋辣椒喎，有邊個C9唔想。
再睇多次個日線圖。噚日恒指彈高個裂口位16,769至18,645點，而今日暫至1點22分低位見過18,530點，呢個裂口已經補晒。而指數今日見陰燭向下，隨時有可能落去見100天線，還好「上升軌」喺附近，兩線支持希望有力啦。
再睇埋今日牛熊證嘅情況，牛證有新證上市，最貼價牛見收回價18,204點，即係話下個星期一(12月5日)返嚟會見到新增牛證街貨層推高至18,200至18,299點。而熊證仍然維持於19.200至19,299點作為第一層，撳撳計數機就知中間位見18,749.5點。睇返指數依家擺位，1點26分報18578點，數值上已經低過中間位，又今日見到暫時最貼價牛證街貨17,600至17,699點儲到有成1,765張期指咁肥，呢堆貨之中有幾多會過夜我唔知，只係知道下個星期一返嚟呢層會由依家最貼價將會變成第七層街貨。如果指數反轉頭再次靠近返牛證街貨層，難保佢失心瘋向下追殺街貨 if 呢度仲咁肥而個市又忽然跳掣。
無方向唔會貿然出倉，陪下我家肥貓好過。Happy Friday!
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
