【Now財經台】市傳內地將延續燃油車購置稅及新能源車補貼。消息刺激到有發展新能源車嘅傳統車企，吉利汽車(00175)、長城汽車(02333)等股價表現跑贏「造車新勢力」。
利達財富管理基金經理及合夥人黃耀宗認為，短線而言，吉利喺傳統車企中更有優勢，因為集團近年多次併購國內外大型車企，雖然暫未見到旗下車企合作並產生協同效應，實際提升到造車技術，但仍顯示集團有心轉型嘅思維。
Andy亦認為，美國限制晶片出口到中國嘅問題，只會拖慢內地車企研發如自動駕駛等先進技術，但相信唔會影響生產。
中長線而言，Andy最睇好新能源車龍頭比亞迪股份(01211)，指估值因比亞迪股東巴郡減持等負面新聞而回落好多，大行大和車股都係揀比亞迪，因為有垂直的供應鏈，由電池到IGBT半導體都可以自己包辦。
