【Now財經台】醫藥股今日逆市跌，石藥集團(01093)一度挫逾12%，京東健康(06618)亦一度跌逾5%。中國藥監局今日公布《藥品網絡銷售禁止清單》，禁止包括疫苗、中藥配方顆粒等藥品喺網上銷售，加上新一批國家藥品帶量採購嘅中選藥品，據報平均降價48%，銷量及售價上嘅打擊係咪醫藥股今日普遍受壓嘅原因？
獨立股評人譚智樂話，醫藥股今日大跌有機會係上述提及嘅原因，不過，石藥股價之前升得比較多，有機會喺關鍵阻力遇阻，借消息獲利回套。佢又話，其實內地一向對處方藥物有較嚴格規管，所以網上醫療股如阿里健康(00241)、平安好醫生(01833)，今日未有因消息而捱沽，而帶量採購政策已經唔係新鮮事，相比第1次推行時要降價90%，今次減幅算係合理，加上被採購藥物冇銷售開支，藥企盈利仍然可觀。
Arnold又認為，醫藥股只係出現較大幅度調整，加上醫藥股Beta值高，會大上大落，因此，呢個消息長遠對股價嘅負面影響唔大。
