【Now財經台】截至早上11點，1小時內《彭博》用戶關注度上升最多嘅港股，石藥集團(01093)、中升控股(00881)、融創中國(01918)、雅居樂(03383)、永利澳門(01128)。
今日排行榜石藥嘅搜尋量明顯拋離另外四隻上榜股份。石藥研發緊嘅MRNA新冠疫苗第二期臨床測試結束，已經向歐盟提交咗申請，但今朝股價都要大幅回調超過10%，因為國家藥監局發布「藥品網絡銷售禁止清單」，禁止網上銷售疫苗、醫療機構製劑、中藥配方顆粒等一系列藥品，新冠疫苗股今朝幾乎全線逆市下跌，新清單係咪會顯著收窄藥廠分銷藥品嘅渠道，影響石藥等藥物股嘅收益？
椽盛資本投資總監曾永堅指，石藥受禁售清單影響嘅產品主要係精神病用藥，對集團其他產品未必有致命打擊，石藥喺內地唔係側重網上平台銷售，亦有海外市場，股價急跌可能係市場擔心禁售清單未來會涵蓋更多藥品，或者只係全面禁止網上銷售藥品嘅開端。
Jasper認為，今次市場反應係大咗啲，佢估計喺8.6元附近，即50天線嘅水平，會有個支持位。
