【Now財經台】藍籌股周大福(01929)噚晚出咗中期業績，9月底為止中期營業額增逾5%，但純利跌近7%，維持去年同期嘅派息。
多家大行都話，集團下半年嘅內地同店銷售表現會更差，管理層亦預期將錄得高單位數跌幅。
周大福今日股價一度挫15%，紅蟻資本投資經理李澤銘認為係跌過龍。佢續指，雖然上半年純利受累匯兌虧損，及黃金相關金融衍生產品嘅投資虧損，但經營利潤只係稍遜預期。
周大福今日股價大跌，佢相信係投資者見周大福管理層下調經營指引，於是擔心下半年業績會更差，加上憂慮金價下行趨勢會延續，令集團下半年嘅毛利率受壓，就先行獲利離場。
Alan話，隨著更多大行更新對集團今、明兩年嘅盈利預測，相信會出現「削盈測潮」，並估計股價反彈空間唔大。
