【股市脈搏】呢隻「抽水股」復牌爆升唔尋常？

【Now財經台】日前宣布配股集資嘅滿地科技(01400)今朝復牌，股價不跌反升，今朝平開後，升幅擴大，一度大升逾38%，高見0.87元。

公司噚晚出通告修訂配股價，由原來0.51元改為0.52元，折讓幅度由19%收窄至約17%，集資淨額都大咗，調高配售價可能係反映配售反應唔錯，但似乎唔係好解釋到股價點解今日異常地大升。

滿地科技財務狀況都唔係咁好，截至中期止，手頭現金僅數十萬元，但借貸額高達10億元，集團市值僅逾6000萬元，財務狀況又唔理想，投資者要留意連串動作後，仲會有冇消息跟尾。