【now.com財經】今朝揀咗隻恒指熊(62316)出嚟，Mark定進取嘅見五分鐘圖保歷加中軸有阻力就偷位出貨；安全嘅等返Slow STC(14,3)做Swing Trade。
進取Mode嚟講，指數喺10點45分時見有喺五分鐘圖上上破過保歷加通道中軸，過多五分鐘開始見佢企唔穩，再過多五分鐘就見指數低走返條保歷加通道中軸以下，吼呢個位入隻(62316)可以，但有一樣嘢留意嘅係，同步保歷加通道口都收窄中，所以要預計到喺保歷加底線向上嘅情況下，限制咗指數向下嘅空間，即影響到(62316)嘅賺幅。
既然有合適嘅落場位，(62316)照計數，以10點55分見指數再次低走於中軸起計10分鐘作為入場時間，(62316)期內高低位做過0.046元/0.043元計，平均買入價為0.0445元。
呢一注真係唔係捱得好耐，因為喺落場之後15分鐘，就見指數稍稍向上頂穿中軸，再過多五分鐘直頭企返上去，所以(62316)唔可以再守。以11點25分見指數重上中軸後On top比多10分鐘作為走貨時間，以期內高低位做過0.045元/0.041元計，平均走貨價為0.043元，平均輸1.5格或3.37%。
至於安全Mode嘅玩法，基本上都係未有機會出動，事關等咗成個朝早都未見到Slow STC(14,3)上到超買範圍，唯有下晝再等。
下半場開市之後，原本都以為指數會繼續咬中軸，但喺1點10分時，指數忽然一下子抽高，仲上破250分鐘線(五分鐘圖50線)，同步Slow STC(14,3)兩線都上到超買至嚴重超買範圍，去到1點20分再見Slow STC(14,3)確認觸頂回落，呢個位係符合咗(62316)安全Mode出貨位，以期內(62316)高低位做過0.042元/0.037元計，平均買入價為0.0395元。
依家1點24分，五分鐘圖上見指數同Slow STC(14,3)都有同步向下，但睇嚟下行嘅速度都係麻麻地，仲要反過來小心指數落返去50分鐘線似有支持。去到1點35分，果然指數喺50分鐘線上出下影線，再過多五分鐘重上250分鐘線，算啦，恒指熊都係不宜久留，以1點35分至1點40分見50分鐘線有支持而敗走(62316)，期內高低位做過0.04元/0.032元計，平均敗走價為0.036元，呢趟平均輸0.035格或者8.97%。
還好，都係可接受嘅幅度，而呢兩注都會一齊計入今個月嘅【月度報告】，因為真係出到場嘛，餘下嘅時間都係抖陣算，輸少當贏無謂掃Happy Friday嘅興。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
