【Now財經台】截至早上11時止，1小時內《彭博》用戶關注度上升最多港股，依次小米集團(01810)、郵儲銀行(01658)、碧桂園(02007)、中遠海能(01138)、海螺水泥(00914)。
今日排榜嘅小米嘅搜尋量明顯拋離另外4隻上榜股，集團噚日收市後出咗第3季業績，轉蝕逾14億人仔，但仍好過市場預期，但股價今朝一度挫逾5%，呢份業績係咪反映手機市場需求仍未回溫？
椽盛資本投資總監曾永堅指，小米收入及利潤都好過市場預期，但按年淨利潤增幅細過市場預期，市場唔睇好小米係因為對高端手機需求睇得保守，而iPhone 14內地銷情其實係一個參考指標。此外，小米喺降本增效方面未見到明顯效益，員工數目及成本反而增加，主要係集團要開發電動車。
Jaseper又話，如果小米股價短期未能重返及守得住9.4元，即50天線水平，有機會下試9元關口，不過，按目前市況，跌至早前低位8.31元機會唔大。
