【Now財經台】多想雲(06696)今朝輕微低開後，跌幅一度擴大至逾23%，低見0.5元，股價最新變動唔大，維持約17%跌幅，成交股數較過去100日同時段平均成交增7倍。
多想雲今個月初上市，主要做內容營銷，即係幫企業做市場管理、廣告宣傳，當中有做數字及SaaS營銷，大客有包括安踏體育(02020)、361度(01361)等。
多想雲基本面其實一般，而SaaS業務喺2021年先開始有營收，但內地經濟轉差，收入呢幾年都下滑。
多想雲噚日喺大成交下急挫後，今日仲未止跌，仲創0.5元嘅上市新低，較招股價「潛水」74%，值得留意係，公司呢兩日喺大成交下急挫，要留意係咪有資金提早散貨。
