【Now財經台】中國華融(02799)今朝高開1.6%後，早市走勢平穩，但午後大幅抽升，一度急升逾26%，高見0.385元，成交股數較過去100日同時段平均增6倍，暫時成交金額逾6300萬元。
今日有多隻「中字頭」股份炒上，投資者可能見華融大股東係有國企背景嘅中信集團，而國家財政部亦持有15%華融H股，吸引資金追入。
不過，華融股價今年已累跌65%，蟹貨重重，加上華融自月初低位0.219元，已反彈咗唔少，難得股價再被踢高，唔少投資者都趁高離場，依家14天RSI升到79嘅超買水平，如果純粹炒作，冇基本面及政策支持，股價或有回套壓力。
