【now.com財經】今朝揀咗隻恒指熊(61478)出嚟，計劃吼五分鐘圖見指數於50分鐘線(五分鐘圖)或保歷加中軸時見阻力先至出場。以今朝Patreon出文時間10點11分，On top加多10分鐘作為睇文時間，即10點21分計，當時指數有稍稍向上往50分鐘線出發，不過未掂到(嚴格嚟講係仲有好大段路)指數就已經再次掉頭向下。即追唔反對，但要識得喺10點35分至10點45分呢三支燭嘅低位，畫到一條爭一點「平底」嘅底線，而將隻淡倉掉走，否則都只係繼續等機會。
不過，(61478)入市策略可能要重新再編過，事關指數喺10點35分至10點45分期間出咗爭一點「平底」之後就掉頭向上，指數仲喺11點35分至11點40分期間出現跌轉升，V型反彈走勢已經成形，爭在喺V彈頸線前指數止步，同一時間，Slow STC(14,3)兩線上到超買至嚴重超買範圍，如果用返一如以往嘅Swing Trade方法，咁呢個時候應該就係(61478)重新編過落場策略嘅時機，博Slow STC(14,3)向下Swing 返落去超賣範圍，然後收工，完成Day Trade。(吼Slow STC(14,3)上到超買落淡倉呢一注今朝無喺【輪證贏家】提出過，所以(61478)呢一注亦都不會記錄喺【月度報告】裡面)
【看圖PICK股】喺Patreon都出現咗102篇文章，即係話呢個Topic都出現咗有接近三個月。有會員留意到當【看圖PICK股】裡面一面倒只可以揀出看淡個股，隨後嗰兩三日就會開始見到恒指回軟；相反如果你一面倒揀到看好個股，隨後兩三日就會到恒指有力反彈，上行嘅過程中會開始搵到啲好淡參半嘅個股，一直全線看淡之後先見回，反過來亦都係一樣。及至近日嘅【看圖PICK股】，其實已經連續第三定第四日全線只可以搵看淡個股，今日恒指日線圖再測 試多次10天線，以暫時1點20分見恒指低位17,411點計，的確係低過10天線17,520點。
之前畫過日線圖上恒指有見「孤島頂」，到今日「孤島頂」右邊個裂口都仲見到，「孤島頂」相信可以確認，一旦今日收市低過10天線的話，蓋目前指數靠近牛證街貨，下一站見返50天線(17,081點)都唔出奇。
拉多條由10月21日至今嘅「上升軌」，還好尚未失守，但同50天線嘅距離都真係差唔多。睇返淡一啲，臨完場前10分鐘，睇下Slow STC(14,3)會唔會踩返上超買位，咁出隻淡倉過夜嘅勝算會再加大啲(至少可以博埋第二日見Swing Trade)。
恒指熊(61602)，收回價18200點，同現價有逾630點差距，若然之後指數抽高帶起埋Slow STC(14,3)上超買，真係有機會落場但迫到隻(61602)嘅收回距離近咗嘅話，可以自行揀返啲同現價至少有500至600點差距嘅熊仔過夜，始終過夜，揀遠啲好。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
