【Now財經台】截至早上11時止，1小時內《彭博》用戶關注度上升最多港股，依次為中國銀行(03988)、小米集團(01810)、合景泰富集團(01813)、美團(03690)及旭輝控股集團(00884)。
過去幾年，基於內房「3條紅線」，銀行不能隨便借錢畀「踩到紅線」嘅內房，部分內銀因而轉戰其他非利息收入嘅銷售，當中包括理財產品，近日有報道指，由於內地債市大跌觸發理財產品贖回潮，惹嚟監管部門關注，甚至已要求銀行上報流動性情況，今波贖回潮衝擊有幾大？
大華繼顯執行董事梁偉源分析指，睇返市場上嘅資料，較難評估理財產品喺內銀嘅佔比，以往銷售理財產品最積極係招商銀行(03968)，所以應該對招行影響較大，而四大國有銀行涉及嘅金額唔會太大，亦唔會影響流動性。Steven又話，市場對內銀嘅投資價值睇法冇明顯轉變，四大國有銀行資產比較穩定，派息水平即使股市低迷時都有9厘，所以仍有投資價值，展望未來，預期中央會出台更多刺激經濟政策，都唔使太擔心四大國有銀行嘅札關風險。
