【Now財經台】聯合醫務(00722)股價異動，午後最多升7%，高見0.82元，收報0.8元，升5%。
聯合醫務主要提供醫療保健服務，無咩特別消息，但其實基本面唔錯，9月公布嘅全年業績多賺超過1倍，派息亦加碼，12月6日將會除淨，呢個都可能幫到股價一把。
聯合醫務股價同大市同步，上月見過0.63元低位，挨近舊年5月創下嘅上市新低0.6元後，隨即反彈，市盈率(PE)跌穿10倍水平，股價跌到咁殘，反彈都係合理，加埋大股東今年已7度增持，雖然金額唔多，但相信都畀到市場一啲信心。
聯合醫務今日喺成交配合下，衝上250天線，即0.77元水平，技術走勢轉牛，睇下嚟緊係咪可以挑戰1元關口。
