【Now財經台】截至早上11時，1小時內《彭博》用戶關注度上升最多嘅港股依次為雅居樂集團(03383)、融創中國(01918)、合景泰富集團(01813)、中國銀行(03988)及小米集團(01810)。
雅居樂連續2日居榜首，比上日配股「抽水」嘅碧桂園(02007)搜尋量更多，相信市場已經估到雅居樂會接力抽水。
上日碧桂園股價先低後高，守得住配股價，但雅居樂今朝宣布配股後就低開11%，其後跌勢加劇，更失守配股價2.68元，半日挫21%，報2.57元。
獨立股評人譚智樂認為，碧桂園配股消息可能被投資者解讀為資金對集團前景有信心，配合埋上日大升市嘅正面氣氛，令股價得以靠穩，但當接續有內房企業跟機，就會令市場憂慮抽水潮出現。佢補充，過去1年唔少內房企業「抽水」後，仍然消除唔到違約風險。
Arnold又話，現時內房板塊尚有唔少不明朗因素，短線股價波動好正常，亦有機會面對股份因為財務問題而停牌嘅風險，建議介意短線波動嘅投資者可趁早喺跌穿配股價時沽貨。
