【Now財經台】受惠於內地一口氣連出16招撐內房，帶挈內房及物管股勁升，連整條產業鏈相關股都跟升，除咗中國平安(02318)、招商銀行(03968)、明源雲(00909)，連做梳化嘅敏華控股(01999)都有得升。呢啲內房周邊行業、相關股都升得咁誇張，反應係咪過咗龍？
元宇證券投資總監林嘉麒指，雖然股價今日升咗好多，但其實呢啲股份之前都喺高位回落咗唔少，既然之前跌得多，依家大幅反彈都好正常，雖然內房依家仲未見到好實質嘅改善，但市場已經有好多憧憬，後市要留意內房嘅違約情況、債價，先知道市場反應係咪過大。
KK又話，持續嘅政策的確有助改善市場對內房嘅睇法，但未見有實質改善前，依家投機性投資嘅風險仍然唔細，佢又預期，市場氣氛短期唔會明顯轉差，應該同依家差唔多。
