【Now財經台】傢俬股今日同內房股拍住上，其中紅星美凱龍(01528)今朝高開近3%後，升幅一度擴大至逾19%，高見2.56元，午後升幅收窄，成交股數較過去100日同時段平均大增16倍。
雖然紅星美凱龍瓣數多，但都無可避免受內房拖累，集團近日回購A股，似乎希望托返起股價，但實際作用就唔大。
技術走勢方面，股價6月底曾經炒過一轉，而喺成交配合下仲上返100天線，但由於當時市況差，所以企唔穩，之後橫行咗一段時間，上個月仲見埋上市新低1.96元，雖然今日一升已突破50天線，以為有機會挑戰100天線，即2.6元水平，但午後升少一大截，曾退守50天線，即使有機會挑戰100天線，但都只係距離現價約10%，值博空間似乎唔多。
