【Now財經台】創科實業(00669)今日一口氣升穿50天及100天線，暫時仍維持逾10%升幅，其實創科罕有錄得咁大單日升幅，最少係10年以來最大單日升幅，雖然有美國通脹降溫呢個因素，但始終只係憧憬通脹見頂，同埋放減加息步伐，對經濟及消費嘅影響都未見到，但股價就夾咗上去。
英皇證券研究部總監陳錦興指，現階段對美國經濟狀況仲未有好肯定嘅評估，但股價一般都係走前好多，創科股價一直反覆向下，市場覺得聯儲局不斷收緊貨幣政策，會令美國經濟出現深度衰退，而創科股價就係反映呢個憂慮，而當通脹回落，市場就會有正面反應。Stanley又話，依家有資金再重新部署創科，係一個值得留意嘅轉勢訊號。
