【Now財經台】截至早上11時，1小時內《彭博》用戶關注度上升最多嘅港股依次為九龍倉集團(00004)、紫金礦業(02899)、九龍倉置業(01997)、新城發展(01030)及周大福(01929)。
九倉、周大福都係今早MSCI指數半年度檢討嘅相關股，九倉遭剔出MSCI中國指數，股價早段曾急瀉25%，低見20.1元後跌幅大幅收窄至約14%，半日收報23.05元。市場係咪對指數變動過度反應？
大華繼顯執行董事梁偉源認為，好多機構投資者都唔明九倉今朝逆市大跌嘅原因，所以紛紛喺《彭博》搜尋，佢指出，九倉平時成交量唔多，推測今朝可能有細的沽盤不斷累積，股份又欠缺承接力，結果一開市就急插。Steven又話，雖然依家市場知道九倉有咩消息導致跌勢，但暫時未見有大買盤追入返九倉。
