【Now財經台】開拓藥業(09939)今朝低開逾4%後，跌幅一度擴大至逾16%，低見11.32元，其後跌幅略為收窄，午後維持逾10%跌幅，暫時成交逾2.7億元，成交股數較過去100日同時段平均增逾2倍。
集團今朝喺網頁公布，指公司一款新型癌症降解劑取得進展，本來都算係一個好消息，但港股近日市況及氣氛又轉弱，所以對股價冇乜支持。
開拓藥業股價近兩日沽壓都幾大，連埋今日出現兩支大陰燭，值得留意係，公司8月底配售批股份，禁售期已經喺上月底屆滿，會唔會同配股承配人嘅部署有關？開拓藥業今日已跌穿所有平均線，如果公司業務冇突破性發展，股價相信要繼續喺低位浮沉。
