【Now財經台】噚日暗盤走勢強勁嘅新股多想雲(06696)，今日首掛開市價較招股價高48%，早段曾高招股價逾70%，但好快已經要「潛水」，一度低招股價12%，今日因暗盤勁衝咗入去嘅投資者就中晒伏。
華盛証券分析師聶振邦指，新股除咗要留意行業前景，亦要睇招股結果嘅分布，新股公開發售認購率只係超購約1倍，反應唔算好好，乙組方面都只得6個申請人瓜分800萬股，所以大戶認購嘅機會較大。至於配售部分，首25個承配人獲發近1.4億股，所以只係約30個投資者，已經攞咗招股規模嘅街貨逾90%，係股份極度集中下，暗盤升得靚係可以理解，但對大戶來講，成本價就係上市價，股價今日上到3元水平，已有頗大獲利誘因，所以唔排除大戶已經開始沽貨，導致多想雲股價今日高開低走。
