【Now財經台】中軟國際(00354)股價暫時已連升第4日，今朝輕微低開後，好快已掉頭向上，午後升幅擴大，一度升超過8%，高見6.71元，暫時成交金額約2.2億元，成交股數就較過去100日同時段平均多3倍。
中軟股連日炒上，相信同華為喺開發者大會指，明年會發布新系統HarmonyOS 4，同埋講返鴻蒙作業系統營運數據有關，中軟係鴻蒙系統開發者合作方，市場憧憬作業系統發展對集團業務有一定幫助。
不過，雖然行業受惠於政策支持，但中軟股價今年仍累跌43%，10月初低見4.72元後，開始對正面消息有返啲反應，中軟股價近4日累升26%，成交亦配合升勢，今日仲上到100天線，但去到6.55元水平遇阻，可能要先唞唞氣。
