【Now財經台】餐飲股很快會陸續公布業績，不過睇返對上嘅業績，例如大家樂(00341)截至3月底全年只係賺2100萬元，按年跌94%，太興(06811)截至6月底半年，更轉蝕5200幾萬元，嚟緊社交距離措施放寬有冇用？點解啲餐飲股捱到2021年又捱唔到今年？
耀才證券研究部總監植耀輝指，疫情改變晒大家嘅生活習慣，市民寧願返去煮飯都唔會出街食，人流少咗，令餐廳整體收入減少，另一邊廂餐廳嘅成本又冇減輕到，人工、食材、租金等等都冇顯住回落，比起2021年，今年冇咗租金寬免或者凍結租金的措施，又冇政府補貼，令食肆經營狀況變得更加困難，佢認為現時放寬社交距離措施只係利好個氣氛，點都要畀啲時間，餐飲股股價先可以返到去以前嘅水平。
