【Now財經台】聽日除淨嘅合生創展集團(00754)今朝平開後一路向下，午後最多跌逾12%，低見5.75元，不過臨近尾市跌幅收窄，收報6.03元，跌8.6%。
合生創展作為高息內房股，去年至今已連續3次半年度宣布10送1紅股的安排，8月尾宣布今年中期只派紅股不派息，相信係因為內房市場流動性緊張，公司傾向保留更多現金，但此舉對想收息的投資者而言就冇咁吸引。
今次公司計劃派送超過2.6億股紅股，以每手100股派送10股紅股，按今日收市價6.03元計算，股東每手價值僅多咗60.3元，但每股價值則攤薄約9.1%，仲有碎股問題。今日股價大跌，反映部分股東寧願除淨前，沽出股票套現嘅心態。
以股份昨日收市價6.6元計算，扣除除淨因素後，每股應調整至約6元水平，與今日收市價相若。而股價上次見6元水平時，已經係2020年4月嘅「疫情底」，目前保歷加通道底部約5.25元，但通道口正收窄，相信合生股價暫時喺6元水平有支持。
