【Now財經台】截至早上11時止，1小時內《彭博》用戶關注度上升最多港股，依次為龍湖集團(00960)、新奧能源(02688)、中國石油股份(00857)、萬科企業(02202)及華潤置地(01109)。
今日排頭位嘅龍湖，主席吳亞軍突然辭職，但會轉做顧問，唔係全身而退，龍湖今朝一度急瀉逾40%，不過，仲有大行撐，花旗表示，市場對主席離任及流動性問題過慮，繼續維持「買入」評級，市場係咪反應過大、太過恐慌？
富昌證券聯席董事譚朗蔚指，主席辭任令市場恐慌係好正常，認為龍湖對市場敏感度不足。Stevan提醒投資者唔好係市場最恐慌嘅時候撈底，因為依家根本冇一個可以令股價上升嘅誘因，股價最多只係橫行，始終成個行業仍然向下，喺市場失去信心下，無論龍湖今日跌幾多，或者見到跌幅收窄都唔好撈底。
