【Now財經台】金風科技(02208)截至9月底止手頭定單2.55萬兆瓦，有唔少分析都開始唱好風電裝機需求，認為將會迎來新增長，另有分析指，金風積壓大量裝機定單，供應鏈阻滯情況已有改善，加上鋼材價格跌，都有利控制成本，金風又計劃喺巴西設廠，海外業務有望成為新增長引擎，應該點分析集團喺風電裝機嘅發展潛力？
艾德金融聯席董事陳政深認為，新能源始終有國策支持，所以風電裝機業務唔使睇得太悲觀，相信需求可以持續，但仍有隱憂，就係內地經濟仍未重拾動力，新能源企業如金風都會受影響。
海外業務方面，陳政深話同樣有隱憂，就係中國同西方國家嘅關係，例如中美關係，加上全球都面對大衰退風險，投資者都未必敢押注，雖然睇金風整體業務佈局未必太悲觀，但睇返股價，都反映係一個比較審慎嘅展望。
