【Now財經台】截至早上11時止，1小時內《彭博》用戶關注度上升最多港股，依次為東亞銀行(00023)、中升控股(00881)、吉利汽車(00175)、百威亞太(01876)、綠城中國(03900)。
東亞股價噚日跌至14年低位，一度低見7.8元，主要係內房債務佔比較其他本地銀行多好多，而截至6月底止，內房貸款中有9%已經做咗撇帳。依家東亞息率有8厘，公司亦一直有做回購，點解都幫唔到股價？
大華繼顯策略師楊韻銳表示，如果股份前景轉差，導致股價跌、股息率高，反而係一個警號，滙豐控股(00005)日前出業績，針對內房商業地產嘅撥備都加碼，令人東亞下半年相關撥備都會增加。雖然內地推出唔少拯救內房嘅政策，去搞返好內房，例如擔保貸款，但發債規模較小，對提振市場信心作用唔大，加上大政策繼續強調「住房不炒」，而唔少政策都係保障買家為主，對發展商未必有太大扶持，若內房或發展商情況進一步轉差，東亞會最受影響。
